Shkarkimi i drejtorit të Policisë së Shkodrës, Fatmir Lleshi dhe shefit të komisariatit Nik Nikollaj nxori në pah fytyrën e vërtetë të Ilir Prodës, atë të një njeriu dhe drejtuesi që tradhton edhe miqtë e tij në emër të pushtetit dhe që nuk mban asnjë përgjegjësi. Kryepolici nxitoi të gjente përgjegjësit e skandalit të ndërtimeve pa leje në Theth, në një nga zonat më mahnitëse të Shqipërisë, që mikpret qindra e qindra turistë vit pas viti. Me një të rënë të lapsit Proda shkarkoi dy drejtuesit e policisë së Shkodrës.
Barteria e ndërtimeve pa leje, nuk është vetëm një plagë e Thethit. Është një plagë nga e cila po lëngon e gjithë Shqipëria, nga veriu në jug. Ku vit pas viti, e sidomos gjatë fushatave zgjedhore “cibanët” mbillen kudo në çdo hapësirë, duke e shëmtuar çdo ditë e më shumë vendin.
Thethi, që para zgjedhjeve u reklamua nga Benet Beci si shembulli i mirë i zhvillimit të turizmit para zgjedhjeve të 11 majit. Pamjet e vilave të ndërtuara pa leje në zemër të Thethit, investim i një krimineli të regjur në zonë, Prekë Kodrës, u reklamuan nga kryebashkiaku i Shkodrës.
Para zgjedhjeve askush nuk pipëtiti. Nuk tha asnjë fjalë për skandalin, ndërkohë që Thethi po shëmtohej. Ndërsa Edi Rama u kujtua për territoret e zaptuara vetëm pasi siguroi 83 mandate. E nisi luftën me prokuroren Elsa Gjeli, tek e cila gjeti fajtoren e madhe të barterisë. A thua se Elsa Gjeli i ndërtoi vetë brenda natës ato vilëta. “Idhtarët” e kryeministrit e duartrokitën. Thanë Edi Rama më në fund po bën shtet. A thua se Rama nuk është në pushtet prej 12 vitesh.
Askush nuk bëri pyetjet më të thjeshta: kur u ndërtua në Theth? Ku ishte IMT? Po Policia Bashkiake? Po UKT si i lidhi kontratat e ujit? Apo ato të dritave si u lidhën? Po banorët vetë pse nuk reaguan? Marrëveshja e fshehtë ishte kriminale. Ramës i duheshin votat ndaj mbylli sytë. Të gjitha institucionet iu bindën. Tani toka duhet kthyer mbrapsht se është planifikuar t’u ndahet oligarkëve me atë që njihet si paketa e maleve. Ndaj Rama e nisi luftën me Gjelin, sepse kishte vendosur mosfillimin e procedimit për ato ndërtime. Kur e pa që nuk funksionoi sa duhet, edhe pse Ulsi Manja me vrap kërkoi nisjen e procedimit disiplinor për prokuroren, atëherë i bëri një zë Ilir Prodës. Duheshin “koka turku” dhe në radhët e policisë. Proda, pa një pa dy u bind. Pa bërë qoftë dhe analizën më minimale, ose hetuar se në ç’kohë ishin bërë ndërtimet, firmosi shkarkimin e dy drejtuesve të policisë së Shkodrës.
Problemi është: A është kjo zgjidhja? Sepse Proda vetë e pranoi se “abuzimi është bërë mal në sytë e të gjithëve komunitetit dhe vetëm strukturat përgjegjëse nuk e ka marrë vesh akoma”. Po Ilir Proda a ndjen përgjegjësi për këtë mal abuzimesh? A pranon ai në këtë mënyrë se ka dështuar në drejtimin e policisë dhe kontrollin e territorit? A duhet ta veshë ai me uniformën e policit? Gjasat janë që po, derisa të vendosë Edi Rama. Se tashmë kryeministri as nuk të shkarkon. Të detyron të japësh dorëheqjen, kur s’të do më.
