Dështon në Gjykatën e Posaçme seanca e radhës për të pandehurit e dosjes “Plumbi i Artë”. Në seancën e së enjtes, trupa gjykuese do të dëgjonte dëshminë e të penduarit Skerdi Tase, pasi më herët ka dëgjuar dëshminë e të penduarve Nuredin Dumani dhe Erjon Alibej. Seanca u shoqërua me debate të forta, për shkak se gjykata refuzoi kërkesën e avokatëve mbrojtës për të patur të plotë dëshmitë e të penduarit Erjon Alibej. Por SPAK ka fshirë disa pjesë, me arsyetimin se i përkasin proceseve të tjera gjyqësore dhe nuk lidhen me të pandehurit e “Plumbi i Artë”, por me procese të tjera penale. Pas vendimit të ndërmjetëm, avokatët e të pandehurve Henrik Hoxhaj, ish i penduar i drejtësisë, dhe Altin Ndoci kërkuan përjashtimin e anëtarëve të trupës gjykuese me pretendimin se janë të njëanshëm në gjykim. Debatet mes palëve degjeneruan deri në fyerje.
“A mund t’ia ndërprisni fjalën? A mund ta ndërprisni dhe ta nxirrni jashtë!”, iu drejtua prokurori Behar Dibra gjykatës. Avokati Gentian Rumano tha: “Znj. kryetare, unë e bëj këtë kërkesë, pasi në Apel, gjyqtari Dhimitri më thonë ‘a e bëre kërkesën në momentin e duhur’. Ky është momenti i duhur”. Prokurori i Posaçëm vijoi: “A mund ta ndërprisni, sepse nuk do të dëgjojmë idiotësirat e këtij idioti”. Avokati iu kundërpërgjigj: “Ju sapo konsumuat një vepër penale”, dhe më pas braktisi sallën e gjyqit. Për shkak se të pandehurit mbetën pa mbrojtje, procesi u shty për të martën e ardhshme.
