Prokuroria e Posaçme konfirmon zyrtarisht se ka nisur hetimet për Aeroportin Ndërkombëtar të Vlorës, por nuk bën me dije të dhëna të tjera se mbi çfarë baze është regjistruar ky hetim.
“Prokuroria e Posaçme kundër Korrupsionit dhe Krimit të Organizuar ka regjistruar procedim penal në lidhje me kontratën koncesionare të Aeroportit të Vlorës. Ky procedim është në fazën e hetimeve paraprake”, njofton prokuroria.
Hetimet nisin dy muaj pas fluturimit të parë testues, ku një avion në bordin e të cilit ndodhej biznesmeni Behgjet Pacolli u ul në aeroportin e Vlorës.
Aeroporti i Vlorës u ndërtua nga kompania “Mabco Constructions” e biznesmenit shqiptar të Kosovës, Behgjet Pacolli.
SPAK po heton detajet teknike të kontratës koncesionare mes kompanisë së Pacollit dhe Qeverisë Shqiptare për ndërtimin e aeroportit.
Qeveria shqiptare ka marrë përsipër që të garantojë riskun për fitimin e munguar të koncesionarit, duke i garantuar 138 milionë euro të ardhura për 10 vitet e para të operimit nga trafiku i pasagjerëve.
Aeroporti Ndërkombëtar i Vlorës përfshin një investim prej 104 milionë euro dhe ka një sipërfaqe prej 309 hektarësh.
