Pamje të publikuara së fundmi nga TV Dukagjini kanë zbuluar momentet para vdekjes së 30-vjeçarit Agon Zejnullahu më 7 korrik në Lipjan, Kosovë. Videoja, e cila nis rreth 15 minuta para arrestimit fatal, dokumenton sjelljen e policëve ndaj Zejnullahut dhe ka ngritur shqetësim publik për mënyrën e ndërhyrjes.
Vëllai i viktimës, Albani, deklaroi për Dukagjinin se familja nuk ishte njoftuar fillimisht me asnjë raport zyrtar dhe se rasti ishte tentuar të paraqitej ndryshe nga ajo që shihet në pamje.
“Vetëm pasi pamjet u publikuan nga njerëz të vullnetit të mirë dhe mediat, u bë e qartë se çfarë kishte ndodhur në të vërtetë. Ajo nuk është forcë e tepruar, është dhunë çnjerëzore ndaj një qytetari që duhej trajtuar ndryshe,” deklaroi ai.
Pas publikimit të videove, Inspektorati Policor i Kosovës ka arrestuar pesë zyrtarë policorë të përfshirë në rast, ndërsa hetimet po vazhdojnë për të zbardhur rrethanat e plota të vdekjes së Zejnullahut. Ngjarja ka shkaktuar reagime të forta në opinionin publik, ndërsa familjarët kërkojnë drejtësi për 30-vjeçarin.
