Kreu i SPAK, Altin Dumani, gjatë një tryeze mbi vlerësimin e arkitekturës institucionale të Prokurorisë së Posaçme, theksoi rëndësinë e ruajtjes së balancës mes llogaridhënies dhe mbrojtjes së pavarësisë së institucionit.
Dumani deklaroi se deri tani janë trajtuar 61 raste nga ILD për prokurorët e posaçëm, duke dëshmuar funksionimin e mekanizmave të llogaridhënies brenda kornizës ligjore. Ai vlerësoi bashkëpunimin me KLP si një institucion mbështetës për punën e SPAK dhe theksoi se marrëdhëniet me Kuvendin kanë qenë të mira, duke reflektuar rekomandimet në raportet vjetore.
Megjithatë, Dumani paralajmëroi se rekomandimet nuk duhet të tejkalojnë kufijtë kushtetues, pasi mund të rrezikojnë pavarësinë institucionale të SPAK. “Ndërhyrjet konstruktive janë të mirëpritura, por çdo përpjekje për të cenuar pavarësinë përmes rekomandimeve të njëanshme apo të paqarta, rrezikon të çbalancojë kufijtë kushtetues midis pushteteve,” u shpreh ai.
Në fjalën e tij, Dumani nënvizoi edhe boshllëqet ligjore që ekzistojnë mbi statusin e prokurorëve pas përfundimit të mandatit, duke theksuar nevojën për zgjidhje ligjore. “Ky është një shqetësim që e kemi ngritur në Kuvend dhe në KLP, dhe prokurorët e posaçëm meritojnë një përgjigje, cilado qoftë ajo,” tha ai.
Dumani theksoi gjithashtu rëndësinë e rolit të mbledhjes së prokurorëve në vendimmarrjen institucionale të SPAK, duke kërkuar që ky mekanizëm të pasqyrohet më qartë në raportet vjetore.
Sa i përket ekzekutivit, kreu i SPAK u shpreh se vërejtjet për kufizimin e ndikimit në sfera administrative janë të drejta, ndërsa rekomandimet nga Kuvendi duhet të bazohen në analiza të thelluara dhe objektive për të garantuar komunikim institucional pa cenuar pavarësinë funksionale të SPAK.
