Kryeministrit Edi Rama nuk i del e keqja pasi doli bllof me ndërtimin pa leje në Shkodër dhe për këtë po përpiqet me çdo kusht të bëjë “kokë turku” prokuroren Elsa Gjeli. Ditën e djeshme, Rama ka detyruar ministrin e Drejtësisë, Ulsi Manja, të dorëzojë një kërkesë në Inspektoriatin e Lartë të Drejtësisë, ku i kërkon nisjen e një hetimi disiplinor ndaj prokurores për mosfillimin e procedimit penal pas kallëzimit të policisë lidhur me ndërtimin në fjalë.
Në fakt, qëllimi kryesor i kësaj kërkese duket të jetë krijimi i titujve të rinj në media, për të hedhur në opinion idenë se fajtorja e ndërtimit pa leje është prokurorja. Ndërkohë, përgjegjësia kryesore bie mbi institucionet që janë nën varësinë e drejtpëdrejtë e kryeministrit dhe kryebashkiakut të Shkodrës.
Kjo kuptohet edhe nga vetë kërkesa e ministrit Manja në ILD. Në hyrje të saj ku shpjegohen rrethanat faktike, ministria tregon edhe procedurën që ka ndjekur IMT i Bashkisë Shkodër.
“IMT Shkodër, në kontrollin e datës 29.04.2025, konstatoi ndërtim pa dokumentacion ligjor dhe:
U hartua procesverbali nr. 19, datë 29.04.2025.
U mor vendimi nr. 1587, datë 30.04.2025, për pezullimin e punimeve.
U dhanë vendimet nr. 1094 dhe nr. 1334, datë 08.05.2025, për prishjen e objektit dhe gjobë administrative.
Me shkresën nr. 8908 prot., datë 30.04.2025, IMT njoftoi Policinë e Shkodrës për vendosjen e kabinave pa leje.
Komisariati i Policisë Shkodër referoi kallëzimin penal nr. 827, datë 28.05.2025, për veprën penale “Ndërtim i paligjshëm” (neni 199/a i Kodit Penal), në ngarkim të Lene Prronit. Materiali u dërgua në Prokurorinë pranë Gjykatës së Shkallës së Parë Shkodër me shkresën nr. 3217 prot., datë 23.05.2025.”
Pra, IMT Shkodër, pas konstatimit të ndërtimit pa leje (ne date 29 prill), ka marrë vendimin për prishje dhe gjobë administrative pas 10 ditesh (8 maj) pra tri ditë para zgjedhjeve. Por ky vendim duket se ka mbetur vetëm në letër dhe nuk u zbatuar nga institucioni në fjalë.
Nga ana tjetër Policia e Shkodrës është njoftuar më 30 prill, por kjo e fundit, ka paraqitur kallëzim pas plot 1 muaji (në 28 maj).
Ndërkohë prishja e ndërtimit pa leje nisi vetëm pas denoncimeve publike dhe nisjes së aksionit “Tok e Xanun” nga kryeministri.
Atëherë lind pyetja: pse IMT Shkodër nuk zbatoi vendimin për prishjen e objektit më parë, por u aktivizua vetëm kur nisi aksioni i kryeministrit kundër zaptimit të hapësirave publike? Pse vendimi u mor vetëm 3 ditë para zgjedhjeve (e megjithatë nuk u zbatua)? A u përdor si shantazh për zgjedhjet apo për ndonjë praktikë korruptive? Pse nuk u paraqit drejtpërdrejt edhe kallëzim penal në prokurori, por u përcoll materiali në një hallkë shtesë dhe të padobishme si policia ?
Pse Policia e Shkodrës, priti 1 muaj derisa të paraqiste kallëzim penal ne prokurori?
Për çfarë duhej hetimi i prokurores, që IMT Shkodër të zbatonte vendimin që kishte marrë? Sepse kur konstatohet një ndërtim pa leje, objekti jo vetëm prishet pa ndonjë hetim prokurori, por kallëzimi penal bëhet drejtpëdrejt e pa vonesë.
Ky është një fakt tjetër që tregon sesi vartësit e Benet Becit (IMT) por edhe ata të Edi Ramës (Policia e Shtetit), kanë lejuar që ndërtimi pa leje të ngrihet, e kanë përdorur me shumë gjasë në zgjedhjet e 11 majit, dhe e kanë lënë më pas edhe për ca kohë të vazhdojë aktivitetin. Arsyet duhet t’i shpjegojnë vetë kryeministri dhe kryebashkiaku.
