Ervis Cukali, një i shumëkërkuar i policisë prej dy vitesh, Endrit Doku dhe Imer Gega janë tre të arrestuarit nga policia e Sarandës pas një aksioni të mbrëmjes së djeshme, ku për t’iu shmangur prangave, njëri prej të dyshuarve u hodh në det.
“Në lagjen nr. 1, rruga ‘Butrinti’, Sarandë, u ndalua për kontroll automjeti luksoz tip ‘Porsche’, me të cilin udhëtonin 3 shtetas. Gjatë veprimeve, njëri prej tyre, shtetasi Endrit Doku, tentoi të largohej duke u hedhur në det, së bashku me çantën ku ndodhej arma e zjarrit, me qëllim humbjen e provave. Por falë reagimit të shpejtë të punonjësve të Policisë, me mbështetjen e Policisë Kufitare që ndodhej në patrullim në afërsi me mjetin e tyre lundrues, u bë e mundur kapja në flagrancë e tij”, tha policia.
Rezulton se Doku kishte hedhur në det çantën brenda së cilës kishte vendosur pistoletën që mbante pa leje. “Nga punonjësit e Policisë Sarandë u bë e mundur, brenda një kohe shumë të shkurtër, gjetja e çantës me armën që ky shtetas tentoi të fshihte duke e hedhur në det”, tha më tej policia.
Operacioni për arrestimin e tyre u kodua Diving dhe tre të dyshuarit përfunduan në pranga, ndërsa u sekuestrua edhe mjeti luksoz me të cilin udhëtonin.
Endrit Doku, 27 vjeç, dyshohet për veprat penale “Armëmbajtja pa leje” dhe “Kundërshtimi i punonjësit të policisë së rendit publik”; Imer Gega, 21 vjeç, për veprat penale “Moskallëzimi i krimit” dhe “Veprime që pengojnë zbulimin e së vërtetës”; ndërsa Ervis Cukali, 27 vjeç, për veprat penale “Moskallëzimi i krimit” dhe “Veprime që pengojnë zbulimin e së vërtetës”, i cili rezultoi edhe person i shpallur në kërkim për veprat penale “Sigurimi i kushteve dhe i mjeteve materiale për të kryer vrasje” dhe “Mbajtja pa leje dhe prodhimi i armëve luftarake”.
Ervis Cukali rezultoi të ishte person në kërkim prej gushtit 2023, kur në Fier u kapën 21 kg eksploziv dhe synohej eliminimi i një personazhi të njohur të krimit në zonë. Atëkohë u arrestua Albi Mecini, i cili ishte gjithashtu në kërkim për rrëmbimin dhe zhdukjen e Leonard Theodhorit dhe Fatmir Sulovarit në Sarandë.
