Një konflikt mes dy adoleshentëve në ambientet e gjimnazit “Shote Galica” në Fushë-Krujë ka përfunduar me një incident të rëndë.
Një 17-vjeçar, i identifikuar me inicialet K.D., është goditur me thikë nga një bashkëmoshatar i tij. Pas ngjarjes, i plagosuri është transportuar me urgjencë drejt Spitalit të Traumës në Tiranë për të marrë ndihmën e nevojshme mjekësore.
Policia ka nisur hetimet për zbardhjen e plotë të rrethanave të ngjarjes dhe për identifikimin e motivit që çoi në përleshjen mes dy të rinjve. Ngjarja ka sjellë shqetësim tek nxënësit dhe stafi pedagogjik i gjimnazit, ndërkohë që pritet të merren masa për sigurinë në shkollë.
