Një ngjarje e rëndë ka ndodhur mbrëmjen e së mërkurës në fshatin Agonas të Kavajës, ku një 76-vjeçar dyshohet se ka vrarë me mjet prerës vëllain e tij 74-vjeçar.
Sipas informacionit paraprak, rreth orës 20:30, dy vëllezërit ndodheshin në arë duke mbledhur bazën ushqimore për blegtorinë, kur për arsye ende të paqarta, 76-vjeçari ka goditur me thikë vëllain e tij.
I plagosuri u transportua menjëherë drejt spitalit për ndihmë mjekësore, por nuk arriti t’u mbijetojë plagëve të marra dhe humbi jetën gjatë rrugës.
Shërbimet e Policisë kanë bërë të mundur kapjen dhe shoqërimin e autorit të dyshuar, ndërsa grupi hetimor, nën drejtimin e Prokurorisë, po vijon veprimet për zbardhjen e plotë të rrethanave të ngjarjes.
