Trupi i gjetur disa ditë më parë në Cërrunjë është identifikuar zyrtarisht si i 34-vjeçarit Eglant Koçi.
Megjithëse grupi hetimor kishte dyshime të forta që në fillim për identitetin e viktimës, konfirmimi përfundimtar erdhi përmes analizave të ADN-së. Identifikimi u mbështet edhe nga disa elementë krahasues, si shenja e një ndërhyrjeje kirurgjikale, numri i këmbës 40 dhe veshjet e zeza, të cilat përputhen me ato që i riu kishte në momentin e fundit kur u pa.
Trupi është transportuar në morgun e Tiranës, ku pritet që familjarët të kryejnë tërheqjen e tij.
Sipas autoriteteve, kërkimet për 34-vjeçarin kanë zgjatur rreth dy javë dhe janë zhvilluar me pjesëmarrjen e forcave të policisë, të mbështetura edhe nga forca të sigurisë së Kosovës, si dhe me përdorimin e dronëve.
Hetimet vijojnë, ndërsa dyshimet e deritanishme lidhen me mundësinë që Eglant Koçi të jetë vrarë nga miku i tij, Armando Shakaj, i cili ndodhet prej disa javësh në kërkim nga policia.
