Përfaqësuesi i Mabco, Behgjet Pacolli, ka reaguar ashpër lidhur me situatën e krijuar në Aeroportin e Vlorës, duke akuzuar grupe kriminale se po pengojnë vijimin e punimeve në një projekt ku, sipas tij, janë investuar mbi 310 milionë euro.
Përmes një deklarate publike, ai i bëri thirrje SPAK-ut të nisë një hetim të thelluar, duke theksuar se nuk bëhet fjalë thjesht për një konflikt biznesi, por për një çështje që, sipas tij, prek vetë shtetin ligjor.
Bacolli ngriti pikëpyetje mbi rolin e rojeve private dhe bllokimin e aksesit në kantier me mjete të rënda, duke pyetur nëse pengimi i një aktiviteti të ligjshëm dhe moszbatimi i vendimeve gjyqësore përbëjnë vepër penale.
“Prej muajsh Mabco po përballet me pengesa të vazhdueshme, ndërsa sot po shohim moszbatim të hapur të ligjit para syve të të gjithëve”, deklaroi ai.
Sipas Pacollit, bllokimi i hyrje-daljeve në një aset strategjik kombëtar dhe pengimi i zbatimit të vendimeve të Gjykatës së Lartë ngre pikëpyetje serioze mbi funksionimin e institucioneve shtetërore.
Ai theksoi se çështja tashmë nuk lidhet vetëm me Mabco-n apo 2A Group, por me zbatimin e ligjit në Shqipëri dhe autoritetin e shtetit përballë akteve të vetëgjyqësisë.
