Me vendim të Bashkisë së Vlorës dhe Këshillit Bashkiak, të gjitha projektet private duhet të pezullohen gjatë sezonit veror, ndërsa mjetet e tonazhit të rëndë e kanë të ndaluar qarkullimin në segmentet urbane të mbipopulluara dhe të frekuentuara. Por në Vlorë, këto rregulla duket se mbeten vetëm në letër.
Në kulmin e sezonit turistik, kamionët dhe mjetet e tjera të tonazhit të rëndë vijojnë të qarkullojnë lirshëm në të gjithë qytetin. Pavarësisht trafikut të rënduar, ato futen edhe në bulevardin e Vlorës, ku qarkullimi i tyre është kategorikisht i ndaluar.
Situata përsëritet edhe në Lungomare, ku prania e mjeteve të rënda ndikon ndjeshëm në përkeqësimin e qarkullimit rrugor. Pa u shqetësuar nga kontrollet, këto mjete lëvizin edhe në lagjet e qytetit dhe në segmentet lidhëse mes zonave të banuara.
Sipas raportimit të A2 Televizion, puna e Policisë Bashkiake në evidentimin dhe ndëshkimin e këtyre shkeljeve është thuajse inekzistente. Megjithëse ligji dhe rregulloret parashikojnë masa deri në pezullimin e lejes së drejtimit dhe sekuestrimin e automjetit, numri i gjobave të vendosura mbetet i papërfillshëm krahasuar me fluksin e madh të mjeteve të tonazhit të rëndë që qarkullojnë çdo ditë në rrugët e qytetit.
