Deputeti Erald Kapri, në mbledhjen e Komisionit të Sigurisë Kombëtare, përgënjeshtroi postimin e Taulant Balla, i cili pretendonte se në protestën e qytetarëve në Zvërnec kishte edhe qytetarë serbë.
Kapri deklaroi se personi i paraqitur në foton e publikuar nga Balla nuk ishte qytetar serb, por drejtues rajonal i agjencisë “Reuters”, duke theksuar se ekspozimi i tij bashkë me targën e makinës i ka rrezikuar jetën gazetarit.
“Kreu juaj i grupit parlamentar të PS, ka publikuar këtë foton në facebokun e tij. Thotë: “një makinë me targë serbe dhe serb ka shkuar në Zvërnec të protestojë”. Personi në foto është drejtori rajonal i Agjencisë “Rojters”. Një nga gazetarët më të mirë perëndimor që ka ardhur në Zvërnec. Dhe ju i keni rezikuar jetën, deklarata e Taulant Ballës i ka rezikuar jetën zotërisë duke i thënë serb, i ka ekspozuar makinën dhe identitetin personit, një nga gazetarët më të mirë perëndimor.” u shpreh Kapri.
Ai kërkoi gjithashtu që Ministri i Brendshëm dhe drejtuesja e SHISH të thirren për të dhënë llogari mbi pretendimet për “agjentura të huaja” dhe mbi mënyrën se si janë trajtuar protestat në Zvërnec. Sipas Kaprit, deklarime të tilla publike krijojnë tension dhe ngrejnë pyetje serioze mbi sigurinë dhe trajtimin institucional të ngjarjes.
