Bashkimi Europian ka publikuar një mesazh ndërgjegjësues për mbrojtjen e habitateve natyrore, në një moment kur në Shqipëri vijon debati për projektin turistik në Zvërnec dhe ndikimin e tij në mjedis.
Në një postim të shpërndarë nga programi EU4GreenGen, Komisioni Europian thekson se mbi 49% e specieve të shpendëve në botë janë në rënie për shkak të humbjes së habitateve dhe ndotjes së mjedisit.
“Një këngë shpendi është më shumë se tingull, është shenjë e një natyre që jeton dhe merr frymë”, thuhet në mesazh, ku nënvizohet roli i shpendëve në ruajtjen e ekuilibrit të ekosistemeve.
Megjithëse postimi nuk i referohet drejtpërdrejt Shqipërisë apo projektit në Zvërnec, ai vjen në një kohë kur mbrojtja e habitateve natyrore dhe e shpendëve të lagunës së Nartës është kthyer në një nga argumentet kryesore të kundërshtarëve të investimit.
Mesazhi i BE-së përfundon me thirrjen: “Mbroni habitatet natyrore para se qielli të mbetet pa këngë shpendësh. Mbroni natyrën sa jeni në kohë.”
