Qytetarë të shumtë, mes tyre familje të shoqëruara me fëmijë, u mblodhën sërish këtë të diel në Tiranë në ditën e tetë të protestës së nisur fillimisht kundër projektit të investimit në Zvërnec.
Ashtu si në ditët e mëparshme, protestuesit theksuan se kundërshtimi ndaj projektit ishte vetëm pikënisja e lëvizjes, ndërsa sipas tyre problemi kryesor mbetet keqqeverisja, korrupsioni dhe mungesa e përfaqësimit politik.
Gjatë tubimit u dëgjuan thirrje të shumta politike, mes tyre “Rama në burg, Berisha në burg”, “Shqipëria nuk shitet”, “Revolucion”, “Shqipëria e shqiptarëve” dhe “Rama jep dorëheqjen”.
Protestuesit qëndruan për disa orë përpara Kryeministrisë, ku qytetarë dhe aktivistë të ndryshëm morën fjalën. Mes diskutimeve të sotme u hodh edhe ideja e krijimit të një force të re politike që do të dilte nga kjo lëvizje qytetare, megjithëse propozimi vijon të shihet me skepticizëm nga një pjesë e pjesëmarrësve.
Pas fjalimeve, protestuesit nisën një marshim paqësor në rrugët e kryeqytetit. Gjatë ecjes ata u bënë thirrje të rinjve t’u bashkohen protestave dhe të angazhohen më shumë në jetën publike.
Një zhvillim i ri i kësaj dite ishte edhe qëndrimi i Partisë Demokratike. Për herë të parë që nga nisja e protestave, PD u bëri thirrje zyrtare anëtarëve dhe simpatizantëve të saj që të marrin pjesë në tubim.
Protestuesit kanë paralajmëruar se do të vijojnë grumbullimet edhe në ditët në vijim, ndërsa protesta po merr gjithnjë e më shumë karakter politik, përtej kundërshtimit fillestar ndaj projektit në Zvërnec.
