Komisioni Europian ka paralajmëruar Shqipërinë se mënyra se si do të trajtohet projekti turistik në Zvërnec mund të ketë pasoja për procesin e integrimit europian të vendit.
Në një deklaratë për POLITICO, një zëdhënës i Komisionit Europian tha se Shqipëria duhet të shmangë çdo veprim që mund të cenojë përmbushjen e kritereve për mbylljen e Kapitullit 27, që lidhet me mjedisin dhe ndryshimet klimatike.
Paralajmërimi vjen ndërsa protestat kundër projektit të lidhur me Jared Kushner kanë hyrë në ditën e shtatë dhe kundërshtarët e tij argumentojnë se investimi rrezikon një zonë të mbrojtur me rëndësi të veçantë ekologjike.
Sipas Komisionit Europian, Shqipëria duhet të harmonizojë plotësisht legjislacionin e saj me standardet e Bashkimit Europian në fushën e mjedisit, duke përfshirë Direktivën për Shpendët dhe Direktivën për Habitatet.
Brukseli ka kërkuar gjithashtu shfuqizimin e ndryshimeve në ligjin për Zonat e Mbrojtura, si edhe përfundimin e skemës së ligjit për Investimet Strategjike.
“Shqipëria duhet të përmbahet nga veprime që mund të minojnë përmbushjen e kritereve për mbylljen e kapitullit dhe presim që autoritetet shqiptare të veprojnë pa vonesë”, citohet të ketë deklaruar Komisioni Europian për POLITICO.
Deklarata konsiderohet si një nga sinjalet më të forta të Brukselit deri tani lidhur me ndikimin që mund të ketë projekti në procesin e negociatave të Shqipërisë me Bashkimin Europian.
