Zbardhen përgjimet që “fundosin” Jonaid Myzyrin, kreun e Komisionit të Prokurimeve Publike, i cili është marrë i pandehur nga SPAK për shkelje të barazisë në tendera. Myzyri ndodhet nën masën e sigurisë “pezullim nga ushtrimi i detyrës”.
“Vajta i shërbeva si qeni. I shërbeva me sy mbyll... e dua edhe pikë. E dua kështu... firmosim ne, të gjithë si delet. Ime vemi ku të na thërrasin. Rresht. Firmën ne, e lekët ata”, dëgjohet të thotë në përgjime Lindita Skeja, bashkë e pandehur me Myzyrin, njëherazi vartëse e tij.
Përgjimi
Speaker A (Lindita): Ça ka lidhje puna ime oj Nonë. Ajo puna ime qe për me ashtu, po ata na kishin piketu ne... do vinin e do të vrisnin... ja fut kot, puna punë, ça unë si gjith dynjaja... ika unë, vajtën të tjerët... as... a ka vajt njeri t’i vjedhë tek shtëpia ata? Ja fut kot oj Nonë. Ai na mbajti kështu... që krijuam besim që ne jemi miqtë e atij... edhe rrimë të qetë. Na ofroi, mori informacione. Unë vajta dhe i shërbeva si qeni.
Speaker B: Hej Zot!
Speaker A (Lindita): Vajta i shërbeva si qeni. I shërbeva me sy mbyll... e dua edhe pikë. E dua kështu... firmosim ne, të gjithë si delet. Ime vemi ku të na thërrasin. Rresht. Firmën ne, e lekët ata.
Speaker B: A mos i hëngërt o Zot...
Speaker A (Lindita): Bojmë, se e dini ju ç’ju bëj unë, bojmë... më pas...
Speaker A (Lindita): Amin... ata hop mbrapsht ere... hop mbrapsht... hop mbrapsht më çoi mu në KPP... më çoi mu në KPP, përballem atje me lloj-lloj pislliku...
Speaker B: Pi hiç ere unë s've, po edhe tha Dashi motrës: mos shko...
Në dosjen hetimore, Prokuroria e Posaçme thekson se “nga rezultati i përgjimeve ngrihen dyshime të arsyeshme që në vendimmarrjen e KPP për shqyrtimin e ankesës me objekt: “Mirëmbajtje rutinë me performancë rruga Rrëshen (Ura e Fanit) – Shpal, Shpal–Q.Bene – Hadroj, Shpal – Ura e Repsit”, me fond limit 219.866.693 lekë pa TVSH, si dhe në vendimmarrje të tjera, ekzistojnë elementë të veprimeve të kundërligjshme që mund të kenë ndikuar në këto vendime”.
