Aktivisti shqiptaro-amerikan Harry Bajraktari ka njoftuar se i ka dërguar një letër Sekretarit amerikan të Shtetit, Marco Rubio, duke i kërkuar që Shtetet e Bashkuara të rishqyrtojnë mbështetjen e tyre për Dhomat e Specializuara të Kosovës në Hagë.
Sipas Bajraktarit, kërkesa vjen pas nismës së Rubios për të kundërshtuar gjykatat ndërkombëtare që, sipas tij, tejkalojnë mandatin e tyre, bëhen të politizuara dhe cenojnë sovranitetin e shteteve.
"Përvoja e Kosovës me Gjykatën Speciale duhet të përfshihet në këtë nismë. Drejtësia kurrë nuk duhet të jetë selektive, politike apo mekanizëm për ta rishkruar historinë", shkroi Bajraktari.
Në postimin e tij, ai thekson se i ka kërkuar kryediplomatit amerikan të shqyrtojë rolin dhe mbështetjen e SHBA-së ndaj Gjykatës Speciale, duke argumentuar se drejtësia duhet të jetë e paanshme dhe të mos përdoret për qëllime politike.
Postimi plotë
Dje i kam dërguar një letër Sekretarit amerikan të Shtetit, Marco Rubio, me kërkesën që Shtetet e Bashkuara të rishqyrtojnë mbështetjen e tyre për Dhomat e Specializuara të Kosovës në Hagë
Këtë letër e dërgova pas nismës së Sekretarit Rubio për të kundërshtuar gjykatat ndërkombëtare që tejkalojnë mandatin e tyre, bëhen të papërgjegjshme, të politizuara dhe burokratike, duke cenuar sovranitetin, besimin publik dhe të vërtetën historike.
Përvoja e Kosovës me Gjykatën Speciale duhet të përfshihet në këtë nismë. Drejtësia kurrë nuk duhet të jetë selektive, politike apo mekanizëm për ta rishkruar historinë.
Zoti e bekoftë Amerikën. Zoti e bekoftë Kosovën dhe mbarë popullin shqiptar.
