Ervin Salianji duhet të vuajë dënimin e Apelit, një vit burg për akuzën e kallëzimit të rremë. Gjykata e Lartë vendosi të rrëzojë rekursin e ish-deputetit demokrat, duke shuar kështu shpresat e tij për liri.
"Mospranimin e rekurseve të paraqitura nga të giykuarit Jetmir Olldashi dhe Ervin Salianji, kundër vendimit nr.2059/30-2024-6822, datë 26.09.2024, të Gjykatës së Apelit të Juridiksionit të Përgjithshëm"-thuhet në njoftimin e Gjykatës së Lartë.
Salianji është shpallur fajtor për krijimin e provave të rreme ndaj vëllait të Fatmir Xhafajt, me qëllim që ndaj tij të niste një hetim penal. Ai e denoncoi Geron Xhafajn përmes një audiopërgjimi, duke e akuzuar për përfshirje në trafik droge.
Dënimi i Salianjit, në kuadër të dosjes së njohur si "Babale", i heq mundësinë për të garuar në zgjedhjet parlamentare të 11 majit. Ish-deputeti po vuan dënimin në burgun e Fierit.
