Kreu i grupit parlamentar të Partisë Demokratike, Gazment Bardhi, ka komentuar lidhur me çështjen e Xibrakës. Në një postim në rrjetet sociale, ai ka theksuar se prokurori i përfshirë në hetime, sipas tij, nuk ka bërë hetime reale dhe nuk ka vepruar për të zbardhur çështjen për Olsi Ramën.
Bardhi e ka akuzuar prokurorin për manipulim të rasteve dhe fshehje të fakteve, duke e quajtur atë një “manipulator të krimeve të pushtetit”. Ai thekson gjithashtu rëndësinë e transparencës për ruajtjen e besimit të qytetarëve tek institucionet e drejtësisë. Sipas Bardhit, prokurori i njëjtë ka pasur përpjekje të dështuara për të mbrojtur të pandehurit dhe ka fshehur të dhëna të rëndësishme nga ngjarja e Elbasanit.
Postimi
I njëjti prokuror që jo vetëm mashtroi publikisht, jo vetëm fshehu 4 persona të përfshirë në ngjarje që mbeten sot e kësaj dite të pa zbuluar, por sipas Gjykatës së Apelit, bëri të bardhën të zezë në ngjarjen e Elbasanit, u përpoq më kot të bëjë të zezën të bardhë në çështjen Xibraka!
Sipas prokurorit ai ka përfunduar hetimet për Ols Ramën dhe s’ka çfarë veprimesh hetimore të bëjë më shumë, pra ka “pushuar hetimin” për të sa kohë ka dalë me “konkluzion”.
E vërteta është që as ka hetur gjë dhe as ka përfunduar asgjë.
Pyetja është: A ka marrë vendimin e pushimit të çështjes nga gjykata për Ols Ramën sa kohë ka dalë në konkluzion lidhur me të?! Nëse gjykata nuk është shprehur, çfarë hetimi ka përfunduar dhe si mund të arrihet në konkluzion?!
Çertifikimin nësë janë kryer apo jo të gjitha veprimet e mundshme hetimore, ka apo jo prova, përfundon apo pushon hetimi, e merr vetëm gjykata, jo prokuroria!
Pse nuk e dërgoi çështjen në gjykatë për çertifikimin prokurori Shehu, çfarë po fsheh?
Si mund të bëjë njoftime me përmbajtje politike, pa bërë transparencë, çfarë ka hetuar, çfarë veprimesh ka kryer, çfarë ka zbuluar, çfarë e pengon identifikimin e autorëve të tjerë?
Transparenca i shërben ruajtjes së besimit të qytetatëve tek institucionet dhe në këtë rast është jetike sepse bëhet fjalë për një prokuror që është çertifikuar si manipulator i krimeve të pushtetit!
