Deputeti i Partisë Demokratike, Gazment Bardhi, ka reaguar pas deklaratës së Kryeministrit Edi Rama mbi përfundimin e hetimeve të SPAK-ut për çështjen e përfshirjes së vëllait të tij, Olsi Ramës, në laboratorin e drogës në Xibrakë. Bardhi e cilësoi deklaratën e Ramës si një përpjekje për të manipuluar opinionin publik dhe për të ushtruar presion mbi SPAK.
“SPAK ka konfirmuar paaftësinë e tij për të hetuar kryeministrin dhe familjen e tij”
Në një deklaratë për mediat, Bardhi tha:
“Reagimi i Ramës është dëshmi e qartë se ai ka ushtruar presion të vazhdueshëm mbi prokurorinë për të mbyllur një çështje që përfshin vëllanë e tij. SPAK nuk është i pavarur, por i kapur, dhe vendimi për pezullimin e hetimeve për Ols Ramën është dëshmi e kësaj. Nuk mund të ketë drejtësi kur hetimi përfundon me frazën ‘nuk e dimë kush është personi i paidentifikuar, por dimë që s’është Olsi’.”
Pyetjet e Bardhit për Ramën dhe SPAK-un
Bardhi ngriti disa pyetje të drejtpërdrejta:
1.Pse SPAK nuk ka bashkëpunuar me autoritetet gjermane, që kanë nisur hetimin fillestar për këtë çështje?
2.Si është e mundur që makina e përdorur nga Olsi Rama dhe trafikantët ka kaluar kufirin pa regjistrim? Çfarë po fshihet?
3.Pse Ministri i Brendshëm i kohës, Taulant Balla, nuk është thirrur nga SPAK për të dëshmuar, pasi ka deklaruar publikisht se di identitetin e personit të paidentifikuar?
4.Çfarë e lidh Olsi Ramën me makinat e përdorura nga organizata kriminale dhe pse këto prova nuk janë hetuar deri në fund?
“Kryeministri, më shumë se kurrë, po mbron vëllanë e tij”
Sipas Bardhit, deklarata e Ramës është një tentativë e hapur për të amnistuar jo vetëm vëllanë e tij, por edhe vetë qeverinë nga skandalet e shumta të lidhura me krimin e organizuar:
“Një kryeministër që ndërhyn publikisht për të mbrojtur vëllanë e tij, duke sulmuar çdo zë kritik, është dëshmi e qartë e kapjes së shtetit dhe drejtësisë. Ky është një turp për Shqipërinë dhe një alarm për partnerët ndërkombëtarë që kërkojnë drejtësi të pavarur në vendin tonë.”
Në fund të reagimit të tij, Bardhi iu drejtua qytetarëve shqiptarë:
“Është koha që qytetarët të mos heshtin përballë këtij degradimi të drejtësisë dhe kapjes së shtetit. Shqipëria meriton një prokurori të pavarur dhe një qeveri që nuk bashkëpunon me krimin e organizuar, por e lufton atë. Nuk do të ndalemi derisa e vërteta të dalë në dritë!”
