Në Gjykatën e Posaçme Kundër Korrupsionit dhe Krimit të Organizuar ka nisur seanca gjyqësore për padinë e ngritur nga Edmond Sula, ish-drejtori i Policisë së Shkodrës, ndaj deputetit demokrat Gazment Bardhi. Padia përfshin akuzat për “shpifje” dhe “fyerje”, të cilat, sipas Sulës, janë bërë publikisht nga Bardhi.
Në seancën e parë ishte i pranishëm paditësi Sula, ndërsa deputeti Bardhi u përfaqësua nga avokatët e tij, Marash Logu dhe Ledio Braho. Mbrojtja e Sulës paraqiti argumentet e saj, duke theksuar se deklaratat e Bardhit, të bëra më 12 shtator 2024 gjatë një interpelance në Kuvend, kishin shpërndarë informacione të pavërteta për Sula, duke e lidhur atë me grupet kriminale, ndonëse bisedat dhe materialet e përmendura nga Bardhi datonin para emërimit të Sulës në detyrën e tij si drejtor i Policisë së Shkodrës.
Sula pretendoi se këto akuza e kishin dëmtuar rëndë reputacionin dhe karrierën e tij, duke shkaktuar edhe sulme ndaj familjarëve të tij në rrjetet sociale. Ai theksoi se çështja për të cilën u referua Bardhi është ende në shqyrtim dhe se shumë shpejt do të dalë e vërteta.
Në një kthesë të papritur, avokati i Gazment Bardhit, Marash Logu, tërhoqi akuzat, duke theksuar se Bardhi nuk kishte deklaruar asnjë lidhje personale të Sulës me personat nën hetim, por kishte folur për lidhjen e mundshme mes krimit të organizuar dhe Policisë së Shtetit. Logu shtoi se deklaratat e Bardhit ishin pjesë e detyrës së tij si deputet për të ngritur shqetësime lidhur me çështjet e sigurisë dhe korrupsionit.
