Edi Rama ka folur për gati 20 minuta para një prompteri, ku lexoi gjithçka kishte përgatitur për akuzat e drejtuara ndaj tij nga Sali Berisha dhe PD në këto 20 vitet e fundit. Edhe pse me fjalë të zgjedhura ku nuk munguan epitetet fyese për kundështarët politik, qëllimi i vërtetë i daljes publike të kryeministrit në një të dielë me pak lajme ishte qartësisht mesazhi që donte t’i dërgonte Gazment Bardhit, nënkryetarit të PD-së, i cili e akuzoi për përfshirjen e vëllait të tij, Olsi Rama, në trafikun e kokainës.
Pas pezullimit nga SPAK të hetimit për akuzat e z. Bardhi, kryeministri mori sot revanshin duke hedhur poshtë çdo akuzë ndaj tij dhe familjarëve të tij në çdo kohë që ato janë publikuar. Ai akuzoi PD-në, kryetarin e saj dhe të tjerë në këtë parti si një “llum politik” të cilit, sipas tij, shqiptarët duhet t’i mbyllin derën me votën e tyre.
Kryeministri nuk saktësoi nëse vëllai i tij do të padisë Gazment Bardhin për shpifje, pasi, siç tha: “Barrën e provës në një rast të tillë e mban akuzuesi dhe jo i akuzuari.” Me gjasë Olsi Rama do ta padisë nënkryetarin e PD-së në SPAK, duke rikthyer në qendër të debatit politik çështjen se çfarë ndodh kur një politikan shpif për kundërshtarin e tij. Jo më kot Edi Rama e cilësoi këtë çështje si “Babale 2,” dhe duke parë se si përfundoi gjykimi i Ervin Salianjit dhe gjuhën e ashpër sot, vështirë të besohet se ai do të heqë dorë nga hakmarrja politike ndaj Gazment Bardhit.
Me akuzat dhe kundërakuzat e tyre, kohët e fundit politikanët kryesorë në Shqipëri e kanë kthyer SPAK-un në një thes boksi ku shfryjnë inatet, mllefet, ato që thonë apo shpifin për njëri-tjetrin. Vendimi i SPAK për “pezullimin e hetimeve për procedimin penal nr. 88 të vitit 2024, pasi autorët e tjerë të veprave penale nuk janë identifikuar dhe dërgimin e dosjes në polici për hetime të mëtejshme” i ka dhënë një tjetër akuzave penale. Tashmë “fitorja” e vogël e Ramës mund të shërbejë si pika mbështetëse për të nisur një fushatë politike kundër Gazment Bardhit. Ç’ka padyshim do të ndikojë dhe në fushatën e ardhshme zgjedhore. Por a është kjo një formë balancimi për goditjet e derimëtanishme dhe ato të pritshme të SPAK?
Olsi Rama vërtet mund të ndihet më i qetë pas vendimit të SPAK për të, por vëllai i madh ka ende telashe me dosjet që po hetojnë prokurorët e posaçëm për njerëzit më të fuqishëm në politikë. Nëse vëllai i vogël biologjik i ka gjetur një moment lehtësimi, Edi Rama mbetet ende i palexueshëm se ç’fjalim do të mbajë nëse do të ashpërsohen akuzat dhe masat për “vëllain” politik të tij, kryetarin e Bashkisë së Tiranës Erion Veliaj.
