Kryetari i Partisë Demokratike Berisha, ka reaguar gjatë ditës së sotme në lidhje me deklaratat e kreut të qeverisë, Edi Rama, mbi akuzat që kanë qarkulluar për vëllain e tij, Olsi Ramën. Berisha ka theksuar se ka paralajmëruar Ramën për lajme të tjera, duke e këshilluar të mos shqetësojë qytetarët me probleme personale.
Ai ka akuzuar Olsi Ramën për përdorimin e shpeshtë të makinës së grupit të Xibrakës, një automjet që ka shërbyer për udhëtime jashtë shtetit. Sipas Berishës, makina me targën AA653DM është përdorur jo vetëm nga Gentian Gjonaj, por edhe nga Olsi Rama, i cili kishte deklaruar se e kishte përdorur vetëm një herë, për një udhëtim në Selanik. Berisha kërkoi nga Rama që të sqarojë pse ka përdorur shpesh këtë makinë.
"Unë u jap sot disa nga rastet e përdorimit të makinës së famshme të krerëve të grupit të Xibrakës me targë AA653DM.Këtu keni fotografinë e TIMS, e cila tregon disa nga rastet e përdorimit të kësaj makine të famshme të krerëve të grupit të Xibakës për udhëtime jashtë shtetit."
Në vazhdim, Berisha përmendi një letër të protokolluar nga BKH dixhitale, e cila jepte informacione për Olsi Ramën, Gentian Xhixhën dhe Ermal Hoxhën, duke përfshirë një foto që tregon Olsi Ramën dhe Gentian Xhixhën në një qytet evropian. Letrën, sipas Berishës, e kishte marrë për verifikim OPGJ, E.T., por më pas ishte vendosur për ndërprerjen e veprimeve të mëtejshme.
"Përveç kësaj, i them zotit Rama që del dhe mendon se shqiptarët kanë hallet e tij, i them zotërisë së tij që foli dje, e njoftoj se BKH dixhitale ka njoftuar se me datën 7.12.2024, është protokolluar një letër e nënshkruar nga Zaho Koka, pra, dërgues anonim. Letra ka informacion për Olsi Ramën, Genti Xhixhën dhe Ermal Hoxhën." tha Berisha
Sipas Berishës, në letër ishte një foto e qartë ku dukej Olsi Rama, Genti Xhixha në makinë në një qytet evropian. Gjithashtu në letër jepej informacion për rrëmbimin e një biznesmeni me iniciale V.B.
Berisha ka akuzuar gjithashtu drejtuesen e BKH-së, Aida Hajno, për ndërhyrje në hetimet ndaj këtyre rasteve. Ai i bëri thirrje Ramës të mos i shqetësojë qytetarët me problemet e tij dhe të vëllait të tij, duke theksuar se shqiptarët janë të ngopur me gënjeshtrat e qeverisë.
