Monedha europiane euro vijon të pësojë rënie në kursin e këmbimit ndaj lekut shqiptar, duke prekur sërish nivele të ulëta. Ditën e enjte, më 8 maj, euro blihet me 97.8 lekë dhe shitet me 98.7 lekë, duke shënuar një rënie të lehtë krahasuar me ditët e mëparshme.
Ekspertët e tregut valutor lidhin këtë tendencë me efektet që sjell fushata zgjedhore, ku prurjet e mëdha të valutës në treg – kryesisht nga remitancat dhe rritja e shpenzimeve nga subjektet politike – ndikojnë në rritjen e ofertës së euros dhe për rrjedhojë, në rënien e vlerës së saj kundrejt lekut.
Ndërkohë, dollari amerikan ruan stabilitetin, duke u këmbyer me 86 lekë në blerje dhe 87.4 lekë në shitje. Paundi britanik ka ndjekur të njëjtën trajektore si euro, duke rënë në nivelin e 114.4 lekëve në blerje dhe 115.8 lekëve në shitje. Franga zvicerane mbetet e qëndrueshme, me një kurs prej 104 lekësh në blerje dhe 105.2 lekësh në shitje.
Rënia e euros është bërë një fenomen i përsëritur vitet e fundit, veçanërisht në periudha të intensitetit të lartë politik ose sezonal, duke ndikuar drejtpërdrejt në eksportuesit dhe sektorët që marrin pagesa në valutë.
