Në kulmin e fushatës, qeveria ka dhënë 3.6 milionë euro për mbledhjen e liderëve europianë që pritet të mbahet Tiranë më 16 Maj. Kjo shumë është paguar nga Thesari (taksapaguesit) për organizimin e Takimit të Komunitetit Politik Europian në Tiranë. Konkretisht në vendim thuhet se "Drejtoria e Sherbimeve Qeveritare , Kalim fondi sipas vkm 200 per Tak me Komunitetit Politik Evropian , Urdh n.280 dt 27.2.25 , preventimi dt 27.3.25 , vkm nr.200 dt 4.4.25 , shkresa e MF nr.5517/3 dt 7.4.25". Samiti është cilësuar nga kryeministri Edi Rama si një ngjarje madhore për vendin tonë dhe që do të mbledhë liderët e të gjithë kontinentit evropian, nga Londra në Kiev dhe nga Oslo në Ankara. Prej disa ditësh në sheshin Skënderbej kanë nisur përgatitjet duke vendosur një çadër të madhe pas statujës së heroit kombëtar "Gjergj Kastrioti Skënderbeu", teksa paralelisht janë montuar edhe skelat për podiumin e mitingut të Partisë Socialiste. Madje, qeveria në kuadër të këtij samiti ka "qerasur" me pushime edhe administratën duke vendosur që datat 15 dhe 16 maj të jetë ditë pushimi për punonjësit e institucioneve të administratës shtetërore në territoret e bashkive Tiranë, Kamzë, Vorë dhe Krujë. Nga kjo VKM përjashtohen Forcat e Armatosura, Policia e Shtetit, Garda e Republikës, shërbimi zjarrfikës dhe punonjësit e sistemit shëndetësor.
