-Nga Agim Xhafka
Rastësisht sot te berberi, ishin tre klientë brenda lokalot, u hap biseda për zgjedhjet.
Berberi-Për kë do votosh ti, Nuri?
Nuriu-Jo për këto dy kërmat që u bënë 35 vite e asnjë muaj nuk e kam mbyllur pa borxhe. Është rritur pensioni im me pikatore dhe çmimet me galop, me vrap kali dmth.
Berberi-Po për kë pra?
Nuriu-Për një nga këto të rejat.
Berberi-Nxirre pra,thuaje!
Nuriu-Do shoh ç’numër janë këto mortjet e mëdha e do ve kryq te një kolonë çfarëdo. Te ndonjë parti e re pra.
Berberi:-Ti Gent si student…
Genti-Te një parti e re.
Berberi-Ç’thua Ladi, ku do e hedhësh votën?
Ladi-Te të rejat normal.
Mua nuk më pyeti nga që e di kahun që kam. Por më bëri përshtypje votimi për partitë e reja. Para ca javësh përgjigje të tilla ishin si valë liqeni në zheg. Hedh një gur e ngadalë-ngadalë vjen vala te bregu. Tani sërish si valë, por që arrijnë më shpejt te bregu. Nga që liqeni qenka trazuar, po fryn një erë që po shtohet.
E më erdhi ndër mend kënga kolonjare “As e vogël, as e madhe”. E cila përfshiu të madh e të vogël. Ndoshta ka mbërritur çasti që vendi të shkëputet nga dinosaurët e politikës. Partitë e reja me sa po kuptohet, të gjitha së bashku, do kenë aq deputetë sa pa ato nuk do krijohet qeveria e ardhshme dhe institucionet e shtetit. Ndoshta bëjnë pazare, shiten dhe blihen se ka vite që kjo është modë, ama nga piedestali do të rrëzohet arroganca, mburrja, rrena, mashtrimi, korrupsioni masiv. E kaq nuk është pak. Të shpresojmë atëhere e të këndojmë:
-As e vogël, as e madhe…
