Autoritetet franceze kanë vendosur kufizime të qarkullimit gjatë natës në disa zona të qendrës së Parisit dhe në qytete të tjera, pas trazirave dhe plaçkitjeve që përfshinë vendin gjatë fundjavës.
Policia e Parisit njoftoi se shtetrrethimi do të zbatohet nga ora 23:00 deri në 06:00 në sheshin “Place de la République”, ku u mblodhën protestuesit gjatë fundjavës, si dhe në zonën tregtare “Les Halles”. Në disa pjesë të tjera të qendrës së kryeqytetit janë ndaluar edhe tubimet e paautorizuara.
Kufizime të pjesshme janë shpallur gjithashtu në Marsejë, Bordo, Nicë, Lion, Lilë dhe qytete të tjera. Masat ndryshojnë sipas zonave dhe përfshijnë kufizime të lëvizjes së të rinjve apo të grumbullimeve.
Ministri i Brendshëm, Laurent Nuñez, pranoi më herët se policia kishte “humbur kontrollin” në disa qytete. Ai është përballur me kritika të forta nga opozita për përgatitjen e autoriteteve për trazirat, ndërsa presidenti Emmanuel Macron refuzoi dorëheqjen e tij.
Protestat nisën muajin e kaluar nga studentët, të cilët kërkonin kushte më të mira në institucionet arsimore. Më pas, ato u zgjeruan duke përfshirë pakënaqësi të tjera, ndërsa pjesëmarrja gjatë fundjavës u shtua me bashkimin e sindikatave dhe grupeve të ndryshme protestuese.
