- Policia parashikon rreth 500 tifozë problematikë nga Milano dhe 150 nga Parisi.
- Çmimi më i madh i futbollit evropian për klube është në lojë mes dy skuadrave që vitet e fundit kanë ndier dhimbjen e humbjes në prag të trofeut. Interi humbi finalen kundër Manchester City në vitin 2023 dhe PSG-ja humbi të vetmen finale të saj kundër Bayern Munich në vitin 2020.
Tifozët ishin duke u përgatitur për ndeshjen e mbrëmjes duke u nisur drejt zonave të dedikuara për ta disa orë para fillimit. Shumë ndaluan rrugës për të shijuar gastronominë e Mynihut në një ditë të bukur dhe të ngrohtë në kryeqytetin bavarez.
Pranë Odeonsplatz, ku pritej të mblidheshin tifozët e Interit, shumë u ndalën në sheshin fqinj Wittelsbacherplatz — një shesh me kalldrëm, i rrethuar nga godina të hijshme dhe me një statujë bronzi të Maksimilian I, Elektori i Bavarisë, mbi kalë në qendër — ku kërkuan hije nën çadrat e mëdha dhe shijuan drekën me birrë.
Policia mbante nën vëzhgim një grup të madh “ultrasish” të veshur me të zeza, të cilët rrihnin daulle, këndonin dhe valëvisnin flamuj teksa marshonin drejt zonës së tifozëve. Tifozë të tjerë të Interit, të veshur me bluza që i identifikonin si huliganë, i brohorisnin.
Tifozët e PSG-së po drejtoheshin drejt Königsplatz, një tjetër shesh qyteti aty pranë.
Sipas mediave lokale, autoritetet gjermane po llogarisin rreth 500 tifozë të dhunshëm nga Milano dhe 150 nga Parisi dhe kanë dislokuar më shumë se 2000 policë. Helikopterët po monitorojnë qytetin dhe zonën përreth stadiumit, Allianz Arena të Bayern Munich.
PSG e uritur për titullin e parë, Interi ndjek të vetmin trofe të mundshëm këtë sezon
Pasi ka shpenzuar miliarda dhe ka nënshkruar me disa nga lojtarët më të mëdhenj si Neymar, Kylian Mbappe dhe Lionel Messi, PSG ende po pret të fitojë titullin e saj të parë në Ligën e Kampionëve. Këta yje janë larguar, por trajneri Luis Enrique ka ndërtuar një nga skuadrat më emocionuese në Evropë, me emra si Ousmane Dembele, Desire Doue dhe Khvicha Kvaratskhelia që kanë zënë vendin e tyre.
Luis Enrique synon të fitojë këtë kompeticion për herë të dytë si trajner, pasi e fitoi me Barcelonën në vitin 2015, dhe do të bëhej trajneri i shtatë që fiton trofeun me ekipe të ndryshme.
“Motivimi im është ta fitoj për herë të parë titullin e Ligës së Kampionëve për PSG-në,” tha ai. “Ky është dhurata që dua t’ia jap njerëzve, klubit, qytetit.”
Interi po shpresonte për një tripletë pak më shumë se një muaj më parë, por tani i ka mbetur vetëm Liga e Kampionëve si mundësi për trofe. E humbi titullin italian për një pikë dhe u eliminua në gjysmëfinalet e Kupës së Italisë.
“Këta lojtarë në këto katër vite kanë bërë shumë — kanë fituar shumë dhe ndonjëherë kanë humbur. Kështu ndodh. Por të gjithë kemi dhënë gjithçka, të gjithë. Jemi krenarë që jemi Inter,” tha trajneri Simone Inzaghi. “Kam ëndërruar të luaja në finalen e Ligës së Kampionëve. Nuk e arrita si lojtar, por falë këtij grupi lojtarësh kam qenë në dy finale si trajner.”
Interi e ka fituar Ligën e Kampionëve ose Kupën e Evropës tre herë, hera e fundit në vitin 2010.
Ndeshja në Allianz Arena të Bayern Munich është planifikuar të nisë në orën 21:00.
