Italia do të ndalë çdo aktivitet sportiv këtë të hënë, si shenjë zie dhe respekti për ndarjen nga jeta të Papa Françeskut. Vendimi është marrë nga Liga e Serisë A dhe Komiteti Olimpik Kombëtar Italian, të cilët kanë vendosur të shtyjnë të gjitha eventet sportive në vend, përfshirë edhe katër ndeshje të kampionatit elitar të futbollit.
Ndeshjet e planifikuara për këtë të hënë – Parma-Juventus, Torino-Udinese, Cagliari-Fiorentina dhe Genoa-Lazio – do të luhen më 22 prill, ndërsa edhe aktivitetet në sporte të tjera si basketboll, volejboll, tenis, apo sfidat e niveleve të ulëta dhe të moshave në futboll, janë shtyrë për një datë tjetër.
Gjatë gjithë javës që pason, do të mbahet një minutë heshtje për të nderuar Papën, i cili përveçse udhëheqës i Kishës Katolike për vite me radhë, do të kujtohet edhe si një tifoz i zjarrtë i sportit dhe veçanërisht i futbollit.
I njohur për pasionin e tij për skuadrën argjentinase San Lorenzo, Papa Françesku ka pritur shpesh kombëtaret e Italisë dhe Argjentinës në Vatikan, dhe nuk kanë munguar as takimet e veçanta me yje si Lionel Messi. Dhuratat nga futbollistët e kombëtareve dhe skuadrave të ndryshme, Papa i ka pritur gjithmonë me përzemërsi.
Italia sportive, këtë të hënë, hesht në nder të një figure që përtej fesë, la gjurmë të thella edhe në botën e sportit.
