Skandali i basteve të paligjshme që ka shpërthyer në futbollin italian vazhdon të zgjerohet, ndërsa mediat italiane kanë publikuar detaje të reja tronditëse nga hetimet. Futbollistë të njohur të Serie A janë përfshirë në baste me vlera marramendëse, duke luajtur qindra mijëra euro në pak orë dhe duke rënë pre e borxheve të mëdha ndaj rrjeteve kriminale.
Në qendër të hetimeve ndodhen Nicolo Fagioli dhe Sandro Tonali, dy mesfushorët e njohur të futbollit italian, të cilët janë përballur me ndëshkime nga drejtësia sportive. Fagioli, që në kohën e ngjarjes ishte pjesë e Juventusit dhe aktualisht luan për Fiorentinën, sipas dosjeve hetimore, luante deri në 250 mijë euro në vetëm pak orë, duke akumuluar një borxh prej mbi 2.2 milionë euro ndaj rrjeteve të krimit të organizuar.
Hetimet kanë zbuluar se futbollistët, për shkak të borxheve, janë përballur me presione të mëdha dhe kërcënime nga grupe kriminale, të cilat i detyronin të paguanin shuma të mëdha në dorë. Në raste të tjera, për të pastruar paratë, ata janë detyruar të kryejnë blerje fiktive të sendeve luksoze si orë dhe bizhuteri.
Sandro Tonali, ish-lojtar i Milanit dhe aktualisht pjesë e Newcastle në Premier League, rezulton të ketë qenë gjithashtu nën presion të vazhdueshëm për të shlyer borxhet e krijuara nga bastet. Ai ka qenë një tjetër emër kryesor në hetimet e Prokurorisë së Milanos, që tashmë ka vënë nën hetim 12 futbollistë dhe dhjetëra persona të tjerë të përfshirë në rrjetin e basteve të paligjshme.
Ky skandal ka tronditur themelet e futbollit italian, ndërsa autoritetet vijojnë hetimet për të zbardhur të plotë rrjetin që ka përfshirë lojtarë profesionistë, organizatorë basteje dhe figura të krimit të organizuar.
Prokuroria e Milanos ka shpallur zyrtarisht nën hetim 12 futbollistë dhe dhjetëra persona të tjerë, në një skemë që ngjan më shumë me një film mafioz sesa me një histori sportive.
Serie A është në krizë, dhe pas këtij skandali, asgjë nuk do të jetë më si më parë!
