Në ndeshjen e kampionatit të femrave mes Apolonisë së Fierit dhe Gramshit, presidenti i klubit fierak, Koço Kokëdhima, së bashku me disa zyrtarë të tjerë të klubit, ka hyrë në fushë dhe është konfrontuar fizikisht dhe verbalisht me gjyqtarin e ndeshjes, Dorjan Melataj.
Incidenti ka shkaktuar ndërprerjen e takimit për rreth 30 minuta, ndërkohë që, sipas rregullores së Federatës Shqiptare të Futbollit (FSHF), një ndërhyrje e tillë duhej të çonte në përfundimin automatik të ndeshjes. Megjithatë, për shkak të presionit të ushtruar, arbitri e ka rifilluar takimin.
Në fund, Apolonia ka arritur të fitojë me rezultatin minimal 1-0, por tashmë mbetet për t’u parë vendimi i FSHF-së lidhur me fatin e ndeshjes dhe masat disiplinore që mund të merren ndaj klubit fierak.
