Biznesmeni shqiptar Ermal Beqiri, i arrestuar në Francë dhe i kërkuar nga SPAK, ka kërkuar sërish lirimin nga burgu, ndërsa synon të qëndrojë në territorin francez dhe jo të kthehet në Shqipëri.
Sipas gazetës franceze Courrier Picard, Beqiri, i cili vijon të mbahet në burgun e Beauvais, është paraqitur përmes procedurës gjyqësore përpara Dhomës së Hetimeve të Gjykatës së Apelit në Amiens, ku ka kërkuar ndryshimin e masës së sigurisë.
Vendimi për kërkesën e tij pritet të shpallet të premten, më 23 tetor.
Media franceze i ka kushtuar vëmendje edhe pasurive të biznesmenit, duke raportuar për 2,1 milionë euro asete të sekuestruara dhe një kështjellë në departamentin Oise.
Beqiri u arrestua më 24 korrik 2026, pasi avioni i lehtë me të cilin udhëtonte hyri në hapësirën ajrore të kufizuar të centralit bërthamor Penly dhe u detyrua të ulej në aerodromin e Albert-it.
Sipas SPAK, gjatë hetimeve në Francë janë identifikuar llogari bankare me vlerë mbi 2 milionë euro, dy apartamente, automjete dhe një kështjellë e blerë për rreth 2,6 milionë euro.
Biznesmeni është nën hetim nga Prokuroria e Posaçme për disa vepra penale, përfshirë korrupsionin, pastrimin e parave, shkeljen e barazisë në tendera dhe pjesëmarrjen në grup të strukturuar kriminal.
Autoritetet shqiptare kanë paraqitur kërkesën për ekstradimin e tij, ndërsa procedurat gjyqësore në Francë vijojnë.
Burimi: Courrier Picard, 20 tetor 2026
