Situata është tensionuar sërish këtë të martë pranë Ministrisë së Arsimit në Tiranë, ku protestuesit dhe forcat e policisë janë përplasur për herë të dytë brenda ditës.
Përplasjet janë regjistruar në Rrugën e Durrësit, ku një grup të rinjsh kanë hedhur fishekzjarrë në drejtim të efektivëve. Këta të fundit janë përgjigjur duke përdorur ujë me presion dhe gaz lotsjellës për të shpërndarë turmën.
Gjatë tensioneve, efektivët e Forcave Shqiponja kanë tentuar të shoqërojnë një të ri, por janë penguar nga protestuesit e tjerë, të cilët nuk kanë lejuar marrjen e tij nga policia.
Pas ndërhyrjes me autobot, forcat e rendit kanë arritur t'i shtyjnë protestuesit nga Rruga e Durrësit në drejtim të Bankës së Shqipërisë.
Protesta e kësaj të marte nisi para Kryeministrisë, ku studentëve iu bashkuan edhe pedagogët, të cilët kërkuan dorëheqjen e kryeministrit Edi Rama. Gjatë tubimit, disa protestues përmbysën dhe dëmtuan karriget që kreu i qeverisë kishte vendosur përpara godinës, në kuadër të ftesës së tij për dialog.
Megjithëse protesta ka qenë kryesisht paqësore, gjatë ditës janë regjistruar dy episode përplasjesh mes të rinjve dhe policisë, duke e tensionuar më tej situatën në kryeqytet.
