Reshjet e dendura të shiut që nisën në orët e para të mëngjesit të sotëm kanë përfshirë qytetin e Vlorës, rreth orës 05:25. Për shkak të sasisë së madhe të ujit, disa rrugë dhe lagje u përmbytën. Më të prekura kanë qenë lagjja “Pavarësia 3”, zona pranë stadiumit “Flamurtari”, Bulevardi Kryesor dhe rruga “Gjergj Arianiti”.
Po ashtu, nën ujë mbetën edhe lagjet “28 Nëntori”, “Pavarësia” dhe “Kushtrimi”, ku ujërat e mbledhura vijojnë të jenë të pranishme në rrugë.
Situata e ngjashme u regjistrua edhe në Durrës, ku shiu i dendur vazhdoi për disa orë. Prania e ujit u vërejt në zonat e njohura për përmbytje, si kryqëzimi që të çon drejt kompleksit të shkollave të mesme dhe në Shëtitoren “Taulantia”, në segmentin që lidh me zonën e Currilave.
Autoritetet lokale janë duke monitoruar gjendjen, ndërsa qytetarët janë përballur me vështirësi në qarkullimin rrugor.
