Zakonisht, në fundvit kthejmë kokën pas për të parë se çfarë ka ndodhur. Shumë gjëra humbasin në vorbullën e madhe të ngjarjeve të përditshme. Kështu ndodh edhe me ne, sidomos në një vit të vrullshëm si ky që po largohet, i zhurmshëm dhe me gjurmë që ndoshta do të na shoqërojnë për gjatë.
Ne jemi përpjekur t’ju përcjellim të vërteta, lajme dhe analiza të përditshme. Jo gjithçka ka qenë perfekte dhe jo gjithmonë ashtu siç do të kishit dashur. Sepse, siç thoshte Faik Konica, gazetaria nuk është për t’i bërë qejfin askujt, por për të thënë të vërtetën, edhe kur ajo nuk pëlqehet.
Dhe, për ta mbyllur me ngjyra dhe me kujtime, kemi zgjedhur syrin e pagabueshëm të Isa Myzyrajt. Sepse fotografitë na rikthejnë në memorie atë që shpesh e harrojmë, edhe pa dashur. Por pa memorie nuk do të arrijmë kurrë të kuptojmë çfarë kemi lënë pa bërë mirë në këtë vit që po shkon, dhe as të përpiqemi për ta bërë më mirë në 2026.
A do t’ia dalim? Tingëllon bukur si klishe, por data 31 dhjetor… le ta provojmë me fotografi.
Dhe gëzuar nga ne!
Janar – Shëngjin
Një shtetas afgan mban një cigare në dorë në Shëngjin, pak ditë pasi Donald Trump mori detyrën si President i SHBA-së dhe nisi një fushatë të ashpër kundër emigracionit, duke ndërprerë gjithashtu ndihmat për vendet e tjera.
Janar – Tiranë
Fëmijë të komunitetit rom në një lagje të varfër në fund të Bulevardit të Ri, në kontrast të fortë me rritjen marramendëse të çmimeve të apartamenteve përreth.
Shkurt – Prishtinë, Kosovë
Qytetarët e Kosovës votojnë më 8 shkurt 2025 në zgjedhjet e përgjithshme parlamentare, në një proces vendimtar për të ardhmen politike të vendit.
Mars – Tiranë
Me rastin e Ditës Ndërkombëtare të Grave, qindra gra dhe vajza marshojnë në rrugët e Tiranës dhe qyteteve të tjera të Shqipërisë, duke kërkuar më shumë të drejta, barazi dhe siguri.
Mars – Korçë / Tiranë
Mitropoliti i Korçës, Joani, zgjidhet Kryepeshkop i Tiranës, Durrësit dhe gjithë Shqipërisë nga Sinodi i Shenjtë, pas ndarjes nga jeta të Kryepeshkopit Anastas.
Prill – Tiranë
Një murgeshë qëndron në heshtje përpara fotografisë së Papa Françesku në Ambasadën e Vatikanit në Tiranë, një ditë pas ndarjes nga jeta të Papës së parë jezuit në historinë e Kishës Katolike.
Maj – Vatikan
Një grua mbulohet për t’iu shmangur diellit dhe temperaturave ekstreme në Sheshin e Shën Pjetrit, ndërsa besimtarët presin daljen e tymit të bardhë nga Kapela Sistine që simbolizon zgjedhjen e një Pape të ri.
Maj – Vatikan
Dy murgesha, mes mijëra besimtarëve, përshëndesin pas zgjedhjes kreun e ri të Kishës Katolike, Papa Leo XIV.
Maj – Tiranë
Komuniteti LGBT marshon në Tiranë për të kërkuar më shumë të drejta, barazi dhe njohje institucionale në shoqërinë shqiptare.
Maj – Tiranë
Presidenti i Ukrainës, Volodymyr Zelensky, mbërrin në Tiranë në sheshin “Skënderbej” për të marrë pjesë në Samitin e Komunitetit Politik Europian.
Tetor – Tiranë
Tifozët festojnë kualifikimin e Kombëtares së Shqipërisë në Futboll për Kampionatin Botëror, në një moment historik për sportin shqiptar.
Tetor – Tiranë
Qindra mijëra shqiptarë nga të gjitha trevat mblidhen në Tiranë për të mbështetur ish-udhëheqësit e UÇK-së që po përballen në Hagë me akuza për krime lufte.
Nëntor – Tiranë
Opozita proteston përpara Godinës së Qeverisë, pak ditë pasi Prokuroria e Posaçme kërkoi nga Parlamenti leje për arrestimin e zëvendëskryeministres Belinda Balluku.
Nëntor – Lezhë
Dhjetëra shtëpi përmbyten pas reshjeve të dendura të shiut, duke nxjerrë në pah pasojat e krizës klimatike dhe mungesën e infrastrukturës mbrojtëse.
Nëntor – Tiranë
Kryeministri Edi Rama dhe zëvendëskryeministrja Belinda Balluku në Kuvend, një ditë para se Gjykata e Posaçme ta pezullonte Ballukun nga detyra me kërkesë të SPAK.
Nëntor – Shqipëri
Rruga Qukës–Qafë Plloçë shembet vetëm pak javë pas inaugurimit. Projekti kishte kushtuar 260 milionë euro dhe kishte zgjatur 16 vite për t’u përfunduar.
Nëntor – Tiranë
Qindra qytetarë dhe personalitete nga e gjithë Shqipëria presin për t’i dhënë lamtumirën e fundit ish-kryeministrit Fatos Nano.
Dhjetor – Tiranë
Një grafit në muret e jashtme të Universitetit të Mjekësisë, si shenjë e revoltës, ironisë dhe zërit të heshtur të studentëve dhe të rinjve.
Dhjetor – Tiranë
Mijëra qytetarë të thirrur nga opozita protestojnë para godinës së qeverisë, duke kërkuar dorëheqjen e kryeministrit Edi Rama.
