Një figurë thuajse e panjohur për publikun ka marrë drejtimin e Ministrisë së Mbrojtjes. Erman Nufi, i cili deri më tani ka mbajtur postin e drejtorit të kabinetit të zëvendëskryeministres Belinda Balluku, është emëruar ministër i ri i Mbrojtjes.
Nufi nuk ka pasur profil publik politik apo ekspozim të drejtpërdrejtë në çështjet e sigurisë dhe mbrojtjes kombëtare. Karriera e tij është lidhur kryesisht me strukturën e kabinetit të Ballukut, ku ka shërbyer si një nga bashkëpunëtorët më të afërt administrativë të saj.
Emërimi i tij në krye të një prej dikastereve më të ndjeshme – në një kohë kur çështjet e sigurisë rajonale dhe angazhimet në kuadër të NATO-s kërkojnë profil të fortë politik dhe profesional – ka ngritur pikëpyetje mbi kriteret e përzgjedhjes.
Në qarqe politike, zgjedhja e Nufit lexohet si vazhdim i konsolidimit të një rrethi të ngushtë besimi rreth Ballukut. Fakti që ai ka qenë drejtor kabineti i saj shihet si elementi kyç që i ka hapur rrugën drejt postit të ri.
Deri tani nuk ka një prezantim të detajuar publik të vizionit apo prioriteteve të ministrit të ri për sektorin e mbrojtjes. Megjithatë, emërimi i tij shënon një lëvizje që forcon më tej ndikimin e Ballukut brenda arkitekturës qeveritare, duke e shtrirë atë edhe në një ministri strategjike si ajo e Mbrojtjes.
