Në javën e tretë të protestës së banorëve të Rrojllit, Partia Demokratike është shfaqur në mbështetje të tyre. Dy deputetë të PD-së, Luçiano Boçi dhe Bardh Spahia, ishin prezent sot në protestën e radhës kundër resortit të biznesmenit Bashkim Ulaj.
Prania e dy përfaqësuesve demokratë vjen pasi media herë pas here ka ngritur pikëpyetje për mungesën e mbështetjes së opozitës më të madhe ndaj banorëve. Në fillim, Sali Berisha e justifikoi mungesën duke thënë se PD nuk kishte verifikuar dokumentet mbi të cilat bazohen pretendimet e tyre, ndërsa në konferencën e tre ditëve më parë theksoi se partia nuk mund të jetë e pranishme në çdo protestë.
Megjithatë, një fjalë popullore thotë: “më mirë vonë sesa kurrë”.
Kujtojmë se edhe protesta e sotme u shoqërua me përplasje mes policisë dhe banorëve, të cilët pretendojnë se po u vidhen pronat. Ata janë shprehur se ndaj tyre është ushtruar dhunë edhe nga punonjës të sigurisë private, ndërsa akuzojnë shtetin se po mbron “zaptuesit e pronave”.
