Vijojnë hetimet e Prokurorisë së Posaçme për pasurinë dhe dyshimet për afera korruptive e përfshirje në grup kriminal në dosjen e njohur si “AKSHI”.
Këtë të enjte, SPAK ka thirrur për deklarime Xhenila Tamizin, e konsideruar si vartëse e biznesmenit në arrati Ermal Beqiri. Sipas burimeve nga hetimi, në emër të saj rezulton të jetë regjistruar pronësia e një jahti luksoz, që dyshohet se në fakt kontrollohej nga Beqiri.
Nga verifikimet paraprake, mjeti lundrues është sekuestruar nga SPAK dhe aktualisht ndodhet i ankoruar në portin e Durrësit. Hetuesit po shqyrtojnë rrethanat e kalimit të pronësisë dhe burimin e financimit për blerjen e jahtit, në kuadër të hetimeve më të gjera mbi pasuritë e dyshuara si të pajustifikuara.
Dosja “AKSHI” po hetohet për disa vepra penale, ndër to korrupsion dhe pastrim parash, ndërsa hetimet mbi rrjetin e personave të përfshirë vijojnë.
