Eurodeputeti Michael Gahler nga grupi i Partia Popullore Evropiane (PPE) ka lëshuar kritika të drejtpërdrejta lidhur me situatën në Shqipëri dhe procesin e integrimit.
“ Kryeministri ishte shumë në formë kur na ftoi për drekë, por kjo besoj kishte qëllim të na shpërqendronte nga realiteti”, u shpreh ai, duke lënë të kuptohet se përtej takimeve formale, shqetësimet mbeten serioze.
Sipas Gahler, ekzistojnë disa struktura dhe institucione që në gjendjen aktuale nuk mund të hyjnë në Bashkimin Evropian. Ai theksoi problemet me krimin e organizuar si një nga pengesat kryesore që rëndojnë mbi procesin.
Eurodeputeti u ndal edhe te çështja Balluku, duke rikujtuar se Gjykata Kushtetuese ka përcaktuar se SPAK mund të vendosë pezullimin, ndërsa mazhoranca ka refuzuar heqjen e mandatit. “Kjo duhet të ndikojë edhe në qëndrimin tonë”, theksoi ai, duke sinjalizuar se zhvillimet e fundit mund të reflektohen në vlerësimin politik të Brukselit ndaj Tiranës.
Deklaratat vijnë në një moment kur Shqipëria ndodhet në një fazë të rëndësishme të negociatave, por mesazhi nga PPE duket i qartë: retorika diplomatike nuk mjafton përballë problemeve strukturore.
