Kryetari i Gjykatës së Lartë, Sokol Sadushi, tha se mungesa e një praktike gjyqësore të njëtrajtshme krijon pasiguri për qytetarët dhe dobëson besimin publik në drejtësi.
Në konferencën “Cilësia e drejtësisë: qartësi dhe koherencë në interpretim, siguri juridike në zbatim”, Sadushi theksoi se cilësia e drejtësisë nuk matet me shpejtësinë e gjykimit apo me statistika, por me forcën e arsyetimit, qartësinë dhe parashikueshmërinë e vendimeve.
Sipas tij, shpejtësia pa arsyetim dhe pa koherencë kthehet në rrezik për sigurinë juridike, ndërsa vendimet e pakuptueshme nuk e mbyllin konfliktin, por e shtyjnë atë në apel dhe rigjykim.
Sadushi nënvizoi se koherenca e jurisprudencës nuk është luks, por garanci për barazi dhe siguri juridike, duke shtuar se qytetari ka të drejtë ta parashikojë drejtësinë dhe jo ta “hamendësojë” atë.
