Ish ministri i Shëndetësisë, Ilir Beqaj vazhdon të jetë në qelinë e tij në Durrës, ndërsa zëvendësministri i tij, Klodjan Rrjepaj, mbaroi dënimin dhe u lirua ditët e fundit.
Beqaj vazhdon procesin për abuzime me fondet e agjencisë SASPAC që drejtoi më vonë, ndërsa zëvendësi i tij përfundoi dënimin për koncesionin e sterilizimit, firmosur kur Beqaj ishte ministër, dhe që SPAK e më pas Gjykata e gjetën si procedurë korruptive.
Në atë kohë, Beqaj përfaqësonte PS dhe Rrjepaj, LSI-në, një koalicion që nuk u prish mes dy zyrtarëve as kur u ndanë Meta e Rama.
Lirimi i Rrjepajt e ka gëzuar Beqajn i cili i ka shkruar këtë letër me shkrim dore, ku përvecse i uron pafajësi në vijim, gjithashtu i kujton se sterilizimi ishte një proces i drejtë prej të cilit shteti po përfiton akoma.
Letra e plotë nga qelia.....
Klod i dashur,
Jam shumë i gëzuar që mbrëmë ke fjetur në shtëpi me familjen.
Kam mësuar se para pak ditësh ke patur probleme shendetesore, por qe për fat të mirë i ke kaluar.
Bashkë kemi punuar për tre vjet e gjysmë. Nuk e zgjodhëm njëri-tjetrin. Partitë tona politike vendosën që fatet tona të takoheshin.
Ti kishe pasion kujdesin shëndetësor, ndërsa unë politikat publike.
Në tre vjet e gjysmë që punuam bashkë, nuk bëmë as më pak, as më shumë, por zbatuam programin e qeverisë.
Më vijnë në mendje, midis te tjerash, ligji për sëmundjet infektive dhe ligji për urgjencën mjekësore.
Pa këto dy ligje, Shqipëria nuk do t’ia kishte dalë mbanë përballë pandemisë së Covid-19. Kushdo që mburret se ka ndonjë super meritë në atë periudhë, nuk ka kuptuar asgjë.
Për një fakt penal të ndodhur para 11 vjetësh, pas 75 muajsh nga regjistrimi i procedimit penal, edhe pse zgjodhe ritin e gjykimit të shkurtuar, t’u desh të qëndroje 32 muaj në paraburgim për të shlyer të gjithë dënimin. Për të qeshur e për të qarë edhe Gjykata Kushtetuese qe të la në paraburgim në datën 31 mars 2026.
Një proces penal i filluar në mënyrë të paligjshme. Me një vendim pushimi të shtatorit 2016 edhe sot ende në fuqi, procedimi penal u regjistrua në kundërshtim me nenin 329/c të KPrP-së.
Një proces penal i përfunduar në shkallë të parë në mënyrë të paligjshme, me një akuzë që vetë prokurorët pranojnë se nuk është bindje e tyre, por pasojë e supremacisë procedurale të kompetencave që reforma në drejtësi i ka dhënë, me nenin 332/d, pika 3, gjyqtarit të seancës paraprake.
Prej 9 marsit 2026, menaxhimin e integruar të instrumentarit kirurgjikal e kryen një ndërmarrje shtetërore që trashëgoi asetet dhe modelin organizativ të koncesionarit. Zgjedhja jonë e vitit 2014, ne vitin 2026 rezulton se paska qenë e mençur, e saktë dhe e qëndrueshme në kohë.
Vlla (se unë kështu e them, ndersa ti e thua Vëlla),
Kurajo në shkallët e tjera të gjykimit. Jam i bindur qe do te fitosh PAFAJËSINË.
Sinqerisht,
Ilir
Durres
18.04.2026
