Presidenti i SHBA-së, Donald Trump, ironizoi mediat gjatë darkës së Shoqatës së Korrespondentëve të Shtëpisë së Bardhë (WHCA), një aktivitet që u zhvillua nën masa të forta sigurie pasi ceremonia e parë, tre muaj më parë, u ndërpre nga të shtëna me armë.
Në sallë ishin të pranishëm gazetarë të mediave me të cilat Trump ka pasur përplasje të vazhdueshme, përfshirë New York Times, CNN dhe Wall Street Journal, të cilët u nderuan me çmime për punën e tyre.
Presidentja në largim e WHCA-së, Weijia Jiang e CBS News, tha se organizata nuk do të lejonte që dhuna të diktonte të ardhmen e eventit, duke iu referuar incidentit të prillit. Ajo njoftoi gjithashtu se ceremonia e vitit të ardhshëm do të rikthehet në hotelin Washington Hilton, ku ndodhi sulmi.
Atmosfera ndryshoi kur Trump mori fjalën, duke sulmuar ashpër atë që e quajti "media e lajmeve të rreme" dhe duke akuzuar shumë prej gazetarëve të pranishëm se vuajnë nga "Sindroma e Çrregullimit të Trumpit".
Megjithatë, presidenti mbajti edhe një ton më pajtues në disa momente, duke deklaruar se "hera e dytë është gjithmonë më mirë" dhe se respekton "shumicën" e gazetarëve.
"Siç thashë tre muaj më parë, shfaqja duhet të vazhdojë", u shpreh Trump.
Ai bëri thirrje gjithashtu për mbrojtjen e lirisë së fjalës, duke theksuar se mosmarrëveshjet duhet të zgjidhen përmes debatit dhe jo dhunës.
"Ne i zgjidhim mosmarrëveshjet tona jo me plumba, por me debat të hapur dhe të fuqishëm. Asnjë person i armatosur nuk do ta ndryshojë këtë. Nuk mund ta lejojmë që kjo të ndodhë kurrë", deklaroi ai.
Me humor, Trump shtoi: "Ndonjëherë mendoj vërtet se disa prej jush nuk më pëlqejnë", ndërsa më pas ironizoi sallën duke thënë se ishte "mbledhja më e madhe e njerëzve me sindromën e çrregullimit Trump".
Gjatë ceremonisë, presidenti ndau çmime për fituesit, përfshirë një ekip të Wall Street Journal të vlerësuar për raportimet mbi lidhjet e Trump me financierin Jeffrey Epstein. Ai nderoi gjithashtu oficerin e Shërbimit Sekret, Victor Gonzalez, për reagimin e tij gjatë incidentit të armatosur në prill.
Këtë vit aktiviteti ishte dukshëm më i vogël, me rreth 700 pjesëmarrës, krahasuar me mbi 2,000 në edicionin e parë. Masat e sigurisë ishin të jashtëzakonshme, me prani të shtuar të policisë dhe Gardës Kombëtare, kontrolle të dyfishta të identitetit dhe vizitorë që kalonin në korridore të mbrojtura nga agjentë të armatosur të Shërbimit Sekret.
I dyshuari për sulmin e prillit, 31-vjeçari Cole Tomas Allen, akuzohet për tentativë vrasjeje ndaj presidentit të Shteteve të Bashkuara. Ai u arrestua pak çaste përpara se të hynte në sallën ku po zhvillohej ceremonia.
