ATHINË (Reuters) – Ndërsa në Shqipëri SPAK po heton dyshimet për abuzime me fondet e Agjencisë për Zhvillim Bujqësor dhe Rural (AZHBR), një skandal i ngjashëm ka shpërthyer edhe në Greqi. Javën e kaluar, Zyra e Prokurorit Publik Evropian (EPPO) ngriti akuza ndaj 22 personave, mes të cilëve edhe katër deputetë në detyrë të Parlamentit grek, në kuadër të një hetimi për një skemë të dyshuar mashtrimi me subvencionet bujqësore, që ka tronditur qeverinë greke.
Vitin e kaluar, prokurorët evropianë ngritën akuza ndaj dhjetëra blegtorëve grekë, të cilët dyshohet se kishin falsifikuar pronësinë e kullotave për të përfituar miliona euro subvencione nga Bashkimi Evropian, nën pretendimin se ishin ndihmuar nga punonjës të shtetit dhe politikanë të partisë konservatore.
Skandali ka çuar në dorëheqjen e disa ministrave dhe në hetime parlamentare, të cilat deri më tani nuk kanë dhënë rezultate përfundimtare.
Gjithashtu, Bashkimi Evropian ka gjobitur Greqinë për parregullsitë e konstatuara gjatë periudhës 2016–2023 në administrimin e subvencioneve dhe pagesave nga agjencia shtetërore OPEKEPE.
EPPO deklaroi se po ngre akuza ndaj katër deputetëve në detyrë për veprime që dyshohet se janë kryer në vitin 2021. Akuzat përfshijnë shpërdorim të besimit, administrim të paligjshëm të fondeve të BE-së, vërtetim të rremë dhe tentativë për mashtrim kompjuterik. Sipas EPPO-së, akuzat ndaj shtatë deputetëve të tjerë u hodhën poshtë për mungesë provash.
Me kërkesë të Kryeprokurores Evropiane, parlamenti grek votoi në prill për heqjen e imunitetit parlamentar të 13 deputetëve të partisë në pushtet, Demokracia e Re, në mënyrë që ata t’i nënshtroheshin hetimit.
Pas deklaratës së EPPO-së të enjten, zëdhënësi i qeverisë greke, Pavlos Marinakis, tha se katër deputetët, ndaj të cilëve janë ngritur akuza për kundërvajtje penale, konsiderohen të pafajshëm derisa fajësia e tyre të provohet.
Sipas EPPO-së, edhe ish-presidenti i OPEKEPE-së është akuzuar për pesë raste të shpërdorimit të besimit, ndërsa punonjës të tjerë politikë janë akuzuar për kundërvajtje penale. Zyra shtoi se janë ende në hetim veprime të tjera të dyshuara të kryera në periudha të ndryshme kohore.
EPPO, e cila nisi veprimtarinë në vitin 2021, është zyra e pavarur e prokurorisë së Bashkimit Evropian, e ngarkuar me hetimin dhe ndjekjen penale të krimeve që dëmtojnë interesat financiare të bllokut.
Këto akuza vijnë vetëm pak javë pasi policia greke arrestoi 20 persona në ishullin e Kretës, pas shkatërrimit të një grupi kriminal që dyshohet se ndihmonte fermerët të paraqisnin aplikime për përfitimin e fondeve bujqësore të BE-së, duke u bazuar në deklarime të rreme për tokat bujqësore.
Rasti grek rikthen në vëmendje edhe hetimin që po zhvillohet në Shqipëri për fondet e AZHBR-së. Edhe pse bëhet fjalë për çështje të ndryshme dhe në faza të ndryshme hetimore, të dyja kanë në qendër dyshimet për abuzim me fondet bujqësore të financuara nga Bashkimi Evropian dhe rolin e mundshëm të zyrtarëve publikë në administrimin e tyre.
