Autoritetet liberiane kanë realizuar një nga operacionet më të mëdha kundër trafikut të drogës në historinë e vendit, duke sekuestruar gati katër ton kokainë me një vlerë të përllogaritur prej rreth 317 milionë dollarësh.
Operacioni u zhvillua në rrugën që të çon drejt Aeroportit Ndërkombëtar Roberts, rreth 30 kilometra nga kryeqyteti Monrovia, dhe përfundoi me arrestimin e dy shtetasve të huaj.
Sipas Prokurorit të Përgjithshëm dhe Ministrit të Drejtësisë, hetimet zbuluan ekzistencën e një rrjeti të organizuar, të sofistikuar dhe të financuar mirë të trafikimit ndërkombëtar të narkotikëve.
Gjatë operacionit u sekuestruan rreth 3,971 kilogramë kokainë, e paketuar në qindra pako, me një vlerë të vlerësuar në tregun e zi prej 317.7 milionë dollarësh.
Policia Kombëtare e Liberisë publikoi fotografi nga operacioni, ku shihet një kamion me karroceri të hapur i mbushur me çanta që dyshohet se përmbanin drogën e sekuestruar, si dhe prova të tjera të mbledhura gjatë bastisjes.
Ky është sekuestrimi i dytë i madh i drogës në vend brenda pak muajsh. Në qershor, autoritetet konfiskuan 237.6 kilogramë kokainë të fshehur në një ngarkesë tregtare në të njëjtin aeroport, ndërsa ndaj pesë personave dhe një kompanie logjistike u ngritën akuza penale.
Pas operacionit të fundit, presidenti i Liberisë, Joseph Boakai, deklaroi se autoritetet do të intensifikojnë luftën kundër trafikut të drogës.
Ai u zotua se do të "zbulojë dhe shkatërrojë" rrjetet kriminale që veprojnë në vend dhe se çdo person i përfshirë do të mbahet përgjegjës përpara ligjit.
