Ish-ministri i Mjedisit, Lefter Koka, po bën të gjitha përpjekjet për të lënë qelitë e paraburgimit, ku mbahet prej 4 vitesh për aferat e inceneratorëve të Elbasanit, Fierit dhe Tiranës.
Gjatë 10 muajve të fundit, ai ka paraqitur disa kërkesa në Gjykatën e Durrësit, përfshirë edhe atë për liri me kusht.
Më 25 korrik 2025, Gjykata e Durrësit pranoi kërkesën e tij për lirimin me kusht, duke urdhëruar që Koka të vihet nën mbikëqyrjen e Shërbimit të Provës dhe të mos kryejë asnjë vepër tjetër penale gjatë periudhës së mbetur të dënimit.
Megjithatë, për shkak të masave të tjera sigurie të vendosura nga Gjykata e Posaçme, ai vijon të qëndrojë në qeli.
Ndërkohë, Koka ka kërkuar nga Gjykata e Posaçme shuarjen e masës së “arrestit në burg” për çështjen e inceneratorit të Fierit. Seanca u shty për më 20 tetor, pasi dosja ndodhet në Gjykatën e Lartë dhe pritet marrja e procesverbaleve të vendimeve të ndërmjetme.
Në Gjykatën e Durrësit ai ka paraqitur edhe një kërkesë tjetër për shtyrjen e ekzekutimit të vendimit penal, që do të shqyrtohet më 30 tetor 2025. Një tjetër kërkesë për pezullimin e dënimit dhe zëvendësimin e tij me një dënim alternativ është rrëzuar nga gjyqtari Sokol Mara.
