Gjykata e Apelit ka lënë në fuqi masat e sigurimit “arrest në burg” për Fatjon Bushgjokën dhe Petrit Çakrrin, të dyshuar për vrasjen e 23-vjeçarit Renis Dobra. Ngjarja ndodhi mbrëmjen e 8 korrikut, ndërsa një ditë më pas trupi i të riut u gjet pranë liqenit të Shkopetit.
Gjatë seancës, avokatët Arber Qehaja, Fred Gjoni dhe Halit Zhuka zhvilluan debate të ashpra me prokurorin Etien Kapo lidhur me provat që implikojnë të dyshuarit. Avokatët kërkuan lirimin e menjëhershëm të Bushgjokës dhe Çakrrit, duke konsideruar arrestimin e tyre të paligjshëm, por gjykata vendosi të miratojë kërkesën e prokurorisë dhe të mbajë të dyshuarit në burg. Gjykata caktoi gjithashtu afat për grumbullimin e provave shtesë për të vërtetuar akuzën.
Në kërkim për këtë ngjarje janë edhe Kristi dhe Aleksandër Bushgjokaj. Sipas hetimeve, autorët kanë ndjekur të riun që nga qyteti i Burrelit, e kanë dhunuar dhe mbytur rrugës për në banesën e tij. Më pas, për të fshehur krimin, ata hodhën automjetin e tij në liqenin e Shkopetit së bashku me trupin e pajetë.
Të dyshuarit e rrëmbyen dhe mbytën 23-vjeçarin me litarë, duke tentuar ta fshehin trupin, por përpjekja dështoi pasi trupi u gjet në brigjet e liqenit.
