Kreu i Partisë Demokratike, Sali Berisha, ka ngritur akuza të forta ndaj ish-drejtoreshës së SHISH, Vlora Hyseni, dhe biznesmenit Roni Yeffet, duke pretenduar se Shërbimi Informativ Shtetëror ishte vendosur nën një “kontroll të dyfishtë”.
Sipas Berishës, Hyseni, gjatë një raportimi në Komisionin e Sigurisë, ka mohuar lidhje të veçanta me Ergys Agasin, ndërsa ka deklaruar se bashkëjetonte me Roni Yeffet.
“Në njërën anë Agasi, në anën tjetër Roni Yeffet. Shërbimi Informativ ishte vënë nën një kontroll të dyfishtë, të Agasit dhe Roni Yeffet”, deklaroi Berisha, i cili e cilësoi situatën si një skemë që, sipas tij, cenon jo vetëm sigurinë kombëtare, por edhe NATO-n.
Kreu demokrat hodhi akuza edhe për përfitime financiare nga fondet publike. Sipas tij, kompanisë së lidhur me Yeffet i janë dhënë rreth 45 milionë euro nga buxheti i shtetit dhe pasuritë publike.
Berisha e lidhi përgjegjësinë politike për këtë çështje me kryeministrin Edi Rama, ndërsa pretendoi se gjatë kontrollit të ushtruar nga organet ligjzbatuese në banesën e Yeffet, biznesmeni kishte tentuar disa herë të kontaktonte kryeministrin dhe bashkëshorten e tij, Linda Rama.
Megjithatë, vetë Berisha theksoi se pretendimet e ngritura duhet të verifikohen nga organet e drejtësisë.
