Protesta para Kuvendit të Kosovës në Prishtinë po vijon, ndërsa protestuesit kanë nisur të vendosin tenda dhe çadra, duke paralajmëruar se do të qëndrojnë aty deri në votimin e ndryshimeve ligjore për Dhomat e Specializuara.
Gjatë protestës, qytetarët u kanë bërë thirrje deputetëve që shfaqeshin në dritaret e Kuvendit të qëndrojnë “brenda”, ndërsa organizatorët kanë apeluar që të shmanget çdo përplasje me Policinë e Kosovës.
Xhavit Jashari, përfaqësues i Organizatës së Veteranëve të Luftës së UÇK-së, i bëri thirrje Kuvendit që ndryshimet në Ligjin për Dhomat e Specializuara të miratohen edhe në lexim të dytë. Ai kërkoi që në ligj të përfshihet edhe një nen që parashikon shfuqizimin e Gjykatës Speciale.
Sipas Jasharit, kjo kërkesë vjen nga qytetarët dhe protestuesit pas vendimit të 16 shtatorit, ndërsa theksoi nevojën për bashkim dhe unifikim në mbështetje të ish-krerëve të Ushtrisë Çlirimtare të Kosovës.
Protestuesve iu drejtua edhe kreu i Aleancës për Ardhmërinë e Kosovës, Ramush Haradinaj, i cili shprehu mbështetjen për ta dhe përshëndeti njëkohësisht edhe efektivët e policisë.
Haradinaj bëri të ditur se partia e tij u ka kërkuar deputetëve të paraqiten në Kuvend, ndërsa deklaroi se janë “një me çlirimtarët” dhe në mbështetje të protestuesve që prej ditësh qëndrojnë në shesh.
