Kosova përballet sot me afatin e fundit kushtetues për zgjedhjen e Presidentit, ndërsa partitë politike ende nuk kanë arritur një marrëveshje për kandidatin dhe votat e nevojshme. Nëse Kuvendi nuk e përfundon procedurën brenda ditës, ai shpërndahet automatikisht dhe vendi shkon në zgjedhje të jashtëzakonshme.
Sipas vendimit të Gjykatës Kushtetuese, afati 60-ditor për zgjedhjen e kreut të shtetit nisi më 8 gusht dhe përfundon më 6 tetor. Në rast të dështimit, zgjedhjet e reja duhet të mbahen brenda 45 ditëve nga shpërndarja e Kuvendit.
Gjykata e përcaktoi këtë afat pas shqyrtimit të kërkesave të deputetëve të PDK-së lidhur me konstituimin e Kuvendit dhe formimin e Qeverisë. Ajo konstatoi se Kuvendi ishte konstituuar pas skadimit të afatit kushtetues dhe se afati për zgjedhjen e Presidentit kishte nisur të rridhte më 8 gusht.
Pas zgjedhjeve të 7 qershorit, seanca konstituive nisi më 6 gusht, por u ndërpre disa herë. Lëvizja Vetëvendosje kërkonte një marrëveshje paraprake për Presidentin përpara vijimit të procedurave. Kuvendi u konstituua përfundimisht më 13 shtator.
Përpjekjet për një marrëveshje sollën dakordësimin mes Albin Kurtit dhe kryetarit të LDK-së, Lumir Abdixhiku, për kandidaturën e Bekim Sejdiut. Megjithatë, gjashtë deputetë të LDK-së e kundërshtuan marrëveshjen, ndërsa Sejdiu më pas u tërhoq nga gara.
Në diskutimet e fundit, zgjedhja e Presidentit është lidhur edhe me ndryshimet në Ligjin për Dhomat e Specializuara dhe Zyrën e Prokurorit të Specializuar. Kryetari i PDK-së, Bedri Hamza, kërkon miratimin e ndryshimeve në të dyja leximet përpara diskutimeve për një kandidat konsensual.
Kurti, nga ana tjetër, ka kërkuar mbështetjen e projektligjit në lexim të parë dhe më pas votimin e Presidentit. Projektligji u miratua dje në parim, por marrëveshja për kreun e shtetit ende mungon.
Orët e mbetura janë vendimtare për të shmangur një tjetër proces zgjedhor. Nëse përpjekjet dështojnë, Kosova do të përballet me zgjedhjet e katërta brenda dy vjetësh.
